23. 1. 2023: Владыка Мілан Лах став помічным єпіскопом Братїславской єпархії

Як інформує офіціалный сайт Святїшого Престола, в понедїлёк, 23-го януара 2023-го року, Папа римскый Франціск выменовав владыку Мілана Лаха, дотеперішнього єпарху в Пармі, США, за помічного єпіскопа Братїславской ґрекокатолицькой єпархії.

Владыка Мілан, котрый уж быв помічным єпіскопом в Пряшові, став тітуларьным єпіскопом остракіньскым.

Припоминаме, же братїславскый єпарха Петро Руснак є од апріля 2022-го року єдночасно і апостольскым адміністратором sede vacante Пряшівской архієпархії. Став ним по зречіню ся уряду бывшого пряшівского архієпіскопа і метрополиты Йоана Бабяка.

Апостольскым адміністратором sede vacante Пармской єпархії став по выменованю владыкы Мілана Лаха за помічного братіславского єпіскопа владыка Курт Бурнетт, єпарха Пассаіку.

Владыка Мілан Лах

Владыка Мілан Лах народив ся 18-го новембра 1973-го року в Кежмарку. Богословскы штудії закінчів на Теолоґічній факултї Тырнавской універзіты в роцї 2001. На діакона быв рукоположеный владыком Міланом Хаутуром в роцї 2000 в Катедралнім соборї Рождества Пресвятой Богородіцї в Кошіцях, і у 2001-ім роцї там прияв од того самого єпіскопа і священьске рукуположїня. Є членом Товариства Ісусового (єзуіты).

В роках 2001 – 2003 быв у комунітї єзуітів в Кошыцях, де по роцї дїяв і як науковый робітник в Центрї спірітуаліты Выход – Запад Михала Лацка. Од року 2003 до року 2004 быв повіреный веджінём того центру, єдночасно выпомагав як священик в Кошіцях і околіцї. В роцї 2004 зачав высшы штудії на Папскім восточнім інштітутї в Римі, де здобыв у 2006-ім роцї ліценціат з восточных церьковных наук і в роцї 2009 здобыв докторат в тій самій дісціплінї обгаёбов дізертачной роботы Вклад Юрія Іоаннікія Базиловіча,ЧСВВ, до монашеской формації василіянів Мукачовской єпархії в роках 1789 – 1821. Владыка Мілан быв почас римскых штудій і помічным шпірітуалом Папской колеґії Russicum, і духовный асістент Федерації скавтів Европы в Римі. Авторьскы сполупрацовав і з Ватіканьскым радіом.

По навернутю зо штудій в році 2009 робив як директор знова у Центрї спірітуаліты Выход – Запад Михала Лацка в Кошіцях. Єден семестер учів спірітуаліту хрістіаньского Востока на Теолоґічній факултї Католицькой універзіты в Кошіцях, де быв і членом редакчной рады теолоґічного часопису Verba Theologica. Од 1-го децембра 2011 быв продеканом про загранічны односины і розвиток на Теолоґічній факултї Тырнавской універзіты в Братїславі, де вчів хрістіаньску спірітуаліту і спірітуаліту хрістіаньского Востока. Владыка знать італійскый, анґліцькый і російскый язык, пасівно знає і французькый язык.

За помічного єпіскопа Пряшівской ґрекокатолицькой єпархії владыка Мілан быв менованый дня 19-го апріля 2013-го року Папом римскым Франціском. За єпіскопа быв рукоположеный 1-го юна 2013-го року в Лютинї. В періодї років 2016 аж 2017 быв візітатором Конґреґації про восточны церькви про восточны семінарії і колеґії в Римі.

24-го юна 2017-го року быв Папом римскым Франціском менованый за аміністратора Ґрекатолицькой русиньской єпархії в Пармі sede vacante. 1-го юна 2018-го року быв менованый за пармского єпарху, інтронізованый быв 30-го юна того самого року.

Владыка Мілан сам має русиньске походжіня – ёго родічі суть з Остурнї і він ся ку своїм коріням уж не раз приголосив і в різных інтервю про медії. Підпорив і русиньску кампань перед списованём жытелїв у 2021-ім роцї на Словакії.

Петро МЕДВІДЬ, ЛЕМ.фм. Ґрафічна і языкова коректура: АРК в СР.